ஹுங்கார் முதல் டோன்ட் பீ ஷை வரை: இந்த வாரம் ஓடிடியில் வெளியாகும் முன்னணி இந்தி திரைப்படங்கள் மற்றும் இணையத்தொடர்கள்

செப்டெம்பர் 23 முதல் 29 ஆம் திகதி வரையான இந்த வாரத்தில், முன்னணி பாலிவுட் நட்சத்திரங்கள் மற்றும் தயாரிப்பாளர்களின் புதிய இந்தித் திரைப்படங்கள் மற்றும் இணையத்தொடர்கள் பல்வேறு முன்னணி ஓடிடி தளங்களில் வெளியாகவுள்ளன.

பிரியங்கா சோப்ரா தயாரிப்பில் அனீத் பத்தா நடித்துள்ள நீதிமன்ற நாடகத் தொடர், ஆலியா பட் தயாரித்துள்ள இளைய தலைமுறை காதல் திரைப்படம் மற்றும் பரினீதி சோப்ராவின் அறிமுக இணையத்தொடர் உள்ளிட்ட பல படைப்புகள் இந்த வரிசையில் ரசிகர்களின் கவனத்தைப் பெற்றுள்ளன.

பிரியங்கா சோப்ரா ஜோனஸ் நிறைவேற்றுத் தயாரிப்பாளராகக் களம் இறங்கியுள்ள 'ஹுங்கார்: தி ரோர்' (Hunkkaar: The Roar) என்ற இணையத்தொடர் செப்டெம்பர் 25 ஆம் திகதி முதல் ஜியோஹொட்ஸ்டார் (JioHotstar) தளத்தில் வெளியாகின்றது.

செல்வாக்கு மிக்க சாமியார் ஒருவரால் பாலியல் துன்புறுத்தலுக்கு உள்ளாக்கப்பட்டதாகக் குற்றம் சுமத்தி அவருக்கு எதிராகத் துணிச்சலாகச் சட்டப் போராட்டம் நடத்தும் இளம் பெண்ணின் கதையை இத்தொடர் விவரிக்கின்றது.

இதில் அனீத் பத்தா முதன்மைக் கதாபாத்திரத்தில் நடிக்க, ரகுபீர் யாதவ், மொஹமட் ஜீஷன் அய்யூப், சனா பாத்திமா ஷேக், அர்ஜுன் மாத்தூர் மற்றும் சோயா ஹுசைன் உள்ளிட்ட முன்னணி நட்சத்திரங்கள் இணைந்து நடித்துள்ளனர்.

ஆலியா பட் மற்றும் ஷாஹீன் பட் ஆகியோரின் எடர்னல் சன்ஷைன் புரொடக்‌ஷன்ஸ் தயாரிப்பில் உருவான 'டோன்ட் பீ ஷை' (Don't Be Shy) என்ற காதல் நகைச்சுவைத் திரைப்படம் செப்டெம்பர் 25 ஆம் திகதி முதல் அமேசான் பிரைம் வீடியோவில் (Prime Video) வெளியாகவுள்ளது.

ஸ்ரீதி முகர்ஜி எழுதி இயக்கியுள்ள இப்படத்தில் ஆருஷி பஜாஜ், பியூஷ் காதி, பியான்கா அரோரா, குணால் ராய் கபூர், அனுராக் பாசு மற்றும் நேஹா தூபியா ஆகியோர் முக்கிய வேடங்களில் நடித்துள்ளனர். வாழ்க்கையைத் திட்டமிட்டு வாழ நினைக்கும் இளம் பெண்ணொருவர் எதிர்பாராத யதார்த்தங்களை எதிர்கொள்ளும் போது எடுக்கும் முடிவுகளே இப்படத்தின் கதைக் கருவாக அமைந்துள்ளது.

இதனிடையே, பிரபல நடிகை பரினீதி சோப்ரா நீண்ட வடிவ உள்ளடக்கத்தில் முதன்முறையாக அறிமுகமாகும் 'ஷக்: டிரஸ்ட் நோ ஒன்' (Shaque: Trust No One) என்ற மர்ம திரில்லர் இணையத்தொடர் செப்டெம்பர் 24 ஆம் திகதி நெட்பிளிக்ஸ் தளத்தில் வெளியாகின்றது.

கடந்த எட்டு வருடங்களாகக் காணாமல் போன தனது மகளைத் தேடி அலையும் தாயொருவரின் கதையை மையமாகக் கொண்ட இத்தொடரில், தாஹிர் ராஜ் பசின், சோனி ரஸ்தான், ஜெனிபர் விங்கெட் மற்றும் சுமீத் வியாஸ் உள்ளிட்டோர் நடித்துள்ளனர். 

அத்துடன் ஹுமா குரேஷி பிரதான வேடத்தில் நடித்த 'பேபி டு டை டு' (Baby Do Die Do) என்ற அதிரடித் திரைப்படம், திரையரங்குகளில் வெளியாகி 11 வாரங்களை நிறைவு செய்த பின்னர் செப்டெம்பர் 23 முதல் நெட்பிளிக்ஸ் தளத்தில் ஒளிபரப்பாக ஆரம்பித்துள்ளது.