இந்தியாவில் 500 கோடி ரூபாயைக் கடந்து புதிய வரலாறு படைத்த 'ஸ்பைடர் மேன்: பிராண்ட் நியூ டே' திரைப்படம்

டொம் ஹொலண்ட் நடிப்பில் வெளியான மார்வெல் நிறுவனத்தின் 'ஸ்பைடர் மேன்: பிராண்ட் நியூ டே' (Spider-Man: Brand New Day) திரைப்படம், இந்திய பாக்ஸ் ஆபீஸில் 500 கோடி ரூபாய் நிகர வசூலைக் கடந்து புதிய சாதனை படைத்துள்ளது. இதன் மூலம் இந்திய வரலாற்றில் 500 கோடி ரூபாய் நிகர வசூலை ஈட்டிய முதலாவது ஹொலிவுட் திரைப்படம் என்ற பெருமையை இப்படம் தனதாக்கியுள்ளது.

சமீபத்திய வர்த்தகத் தகவல்களின் அடிப்படையில், இந்தியாவில் ஏழு வாரங்களை நிறைவு செய்துள்ள இத்திரைப்படம் 2 இலட்சத்து 75 ஆயிரத்திற்கும் அதிகமான காட்சிகளில் திரையிடப்பட்டு, 500.10 கோடி இந்திய ரூபாயை நிகர வசூலாகப் பெற்றுள்ளது.

இதன் மூலம் இந்தியாவின் மொத்த வசூல் சுமார் 598.31 கோடி ரூபாயாகப் பதிவாகியுள்ளது. முதல் வாரத்தில் 334.75 கோடி ரூபாயை வசூலித்து அசத்திய இப்படம், இரண்டாவது வாரத்தில் 108.65 கோடி ரூபாயையும், மூன்றாவது வாரத்தில் 32 கோடி ரூபாயையும் ஈட்டியது.

அதனைத் தொடர்ந்து நான்காவது வாரத்தில் 13.65 கோடி, ஐந்தாவது வாரத்தில் 6.43 கோடி, ஆறாவது வாரத்தில் 2.47 கோடி மற்றும் ஏழாவது வாரத்தில் 1.37 கோடி ரூபாய் என நிலையான வருவாயைப் பெற்று இந்த இமாலய மைல்கல்லை எட்டியுள்ளது.

இந்த மைல்கல்லின் மூலம், 2026 ஆம் ஆண்டில் இந்தியாவில் 500 கோடி ரூபாய் நிகர வசூலைக் கடந்த இரண்டாவது திரைப்படம் என்ற அந்தஸ்தையும் இப்படம் பெற்றுள்ளது.

முன்னதாக ரன்வீர் சிங் நடிப்பில் வெளியான 'துரந்தர்: தி ரிவெஞ்ச்' (Dhurandhar: The Revenge) திரைப்படம் இவ்வாண்டில் 500 கோடி ரூபாயைக் கடந்திருந்ததுடன், அதன் வாழ்நாள் திரையரங்கு வசூலாக 1,800 கோடி ரூபாய்க்கும் மேல் ஈட்டியிருந்தமை குறிப்பிடத்தக்கது. 

அத்துடன், இந்தியாவில் இதற்கு முன்னர் அதிக வசூல் செய்த அவதார்: தி வே ஒப் வோட்டர், அவெஞ்சர்ஸ்: எண்ட்கேம், அவெஞ்சர்ஸ்: இன்பினிட்டி வார் மற்றும் ஸ்பைடர் மேன்: நோ வே ஹோம் ஆகிய முன்னணி ஹொலிவுட் திரைப்படங்களின் வசூல் சாதனைகளையும் இப்படம் முறியடித்துள்ளது.

சர்வதேச அளவில் இதுவரை 2.4 பில்லியன் அமெரிக்க டொலர்களுக்கும் அதிகமாக வசூலித்து சாதனை படைத்துள்ள 'ஸ்பைடர் மேன்: பிராண்ட் நியூ டே' திரைப்படத்தின் வெற்றிகரமான திரையரங்கு ஓட்டம் எதிர்வரும் நவம்பர் மாதம் வரை நீட்டிக்கப்படவுள்ளதாக தகவல்கள் வெளியாகியுள்ளன. இதன் காரணமாக இத்திரைப்படத்தின் ஓடிடி (OTT) வெளியீடு 2027 ஆம் ஆண்டு வரை தாமதமாகலாம் என எதிர்பார்க்கப்படுகின்றது.