ஒரு நடிகனாக இருப்பதை விட நட்சத்திர அந்தஸ்து தரும் சுதந்திரமே எனக்குத் தேவை: நடிகர் அசோக் செல்வன் வெளிப்படை

தமிழ் திரையுலகில் ஒரு நடிகராக இருப்பதற்கும் நட்சத்திரமாக மாறுவதற்கும் இடையில் தெளிவான வித்தியாசம் காணப்படுவதாகவும், ஒரு நட்சத்திர அந்தஸ்தை அடைவதன் மூலம் கிடைக்கும் சுதந்திரமே தற்போது தனக்குத் தேவைப்படுவதாகவும் நடிகர் அசோக் செல்வன் தெரிவித்துள்ளார். 

சொந்தத் தயாரிப்பில் உருவாகியுள்ள அன்பில் அவன் திரைப்படத்தின் வெளியீட்டை முன்னிட்டு வழங்கிய விசேட செவ்வியிலேயே அவர் தனது திரையுலகப் பயணம், வர்த்தக ரீதியான மாற்றங்கள் மற்றும் புதிய சினிமா அணுகுமுறைகள் குறித்து விரிவாகப் பகிர்ந்து கொண்டுள்ளார்.

செப்டெம்பர் மாதம் 25 ஆம் திகதி திரைக்கு வரவிருந்த அன்பில் அவன் திரைப்படம், சில காரணங்களால் ஒக்டோபர் மாதம் 2 ஆம் திகதி திரையரங்குகளில் வெளியாகவுள்ளது.

ஓ மை கடவுளே திரைப்படத்தின் பெரும் வெற்றிக்குப் பின்னர் வித்தியாசமான கதையம்சம் கொண்ட சில நேரங்களில் சில மனிதர்கள் போன்ற படங்களைத் தெரிவு செய்தது நடிகராக சிறந்த தீர்மானமாக இருந்தபோதிலும், வர்த்தக ரீதியாக அது கைகொடுக்கவில்லை என்பதை அவர் வெளிப்படையாக ஒப்புக்கொண்டுள்ளார். 

சினிமாத் துறையில் முழு அர்ப்பணிப்புடன் செய்யும் நல்ல முயற்சிகள் வர்த்தக ரீதியாக வெற்றியடையாத போது, அடுத்தகட்ட பயணத்திற்கு ஏற்ப சந்தையின் தேவைகளையும் கருத்திற்கொள்ள வேண்டிய சூழல் ஏற்படுவதாக அவர் சுட்டிக்காட்டியுள்ளார்.

முன்னர் தான் ஒரு வகையான எதிர்ப்புக் குரலாகச் செயற்பட்டதாகவும், ஆனால் முப்பதுகளின் பிற்பகுதியை நெருங்கும் போது திரைத்துறையில் நமது பேரார்வங்களைச் சாத்தியப்படுத்த வர்த்தகச் சந்தையை ஓரளவுக்குத் திருப்திப்படுத்த வேண்டும் என்ற புரிதல் ஏற்பட்டுள்ளதாகவும் அசோக் செல்வன் தெரிவித்துள்ளார்.

ஓட்டத்துடன் இணைந்து பயணிக்கத் தொடங்கும் அதேவேளை, நாம் விரும்பியதைச் செய்வதே சரியான வழியாக இருக்கும் எனவும், அந்தப் புதிய தொழில்முறைப் பாதையை அமைக்கும் நோக்குடனேயே தான் இப்போது அதிரடி நாயகனாக களம் இறங்கியுள்ளதாகவும் அவர் குறிப்பிட்டுள்ளார்.

அன்பில் அவன் திரைப்படத்திற்கு வேறு எந்தத் தயாரிப்பாளரும் தன் மீது இந்த அளவிற்கு முதலீடு செய்திருக்க மாட்டார்கள் எனவும், பீட்டர் ஹெய்ன் மாஸ்டரின் சண்டைப் பயிற்சிகள் உள்ளடங்கலாகப் பெரும் தொகையைத் தனது சொந்தப் பணத்தில் முதலீடு செய்து துணிச்சலான முடிவை எடுத்துள்ளதாகவும் அவர் தெரிவித்துள்ளார்.

மேலும், பிரபலங்கள் அடக்கமாக இருப்பது போல் போலியாக நடிப்பது தமக்கு ஒருபோதும் ஒத்து வராது எனவும், புகழ்ச்சி பேசி அல்லது போலி வேடமிட்டு வளர்வதை விடத் தன் மீது உண்மையாக இருந்து சவால்களை எதிர்கொள்வதே முக்கியமானது எனவும் அவர் தனது உரையாடலில் தெளிவுபடுத்தியுள்ளார்.