சிங்காரம் திரைப்பட விமர்சனம்: நரிக்குறவர் மக்களின் வாழ்வியலைப் பேசும் யோகி பாபு படம் ரசிகர்களைக் கவர்ந்ததா?

நகைச்சுவை நடிகராகத் தமிழ் சினிமாவில் தனக்கென ஓர் இடத்தைப் பிடித்துள்ள யோகி பாபு, சமூகக் கருத்துகளை மையமாகக் கொண்ட திரைப்படங்களிலும் தொடர்ந்து நடித்து வருகிறார். அந்த வகையில், நரிக்குறவர் சமூகத்தின் வாழ்க்கை, அவர்கள் எதிர்கொள்ளும் சவால்கள் மற்றும் அரசியல் அதிகாரத்தின் அவசியம் ஆகியவற்றைப் பேசும் திரைப்படமாக ‘சிங்காரம்’ உருவாகியுள்ளது.

கே.வி. கதிர்வேலு இயக்கியுள்ள இப்படத்தில் யோகி பாபு, வேல ராமமூர்த்தி, எம்.எஸ். பாஸ்கர், மரியா வின்சென்ட், சார்ம்ஸ், ஆர்த்தி கணேஷ் மற்றும் மனோபாலா உள்ளிட்டோர் நடித்துள்ளனர்.

சமூகத்தில் ஒதுக்கப்பட்ட மக்களின் உரிமைகள் குறித்து முக்கியமான கேள்விகளை எழுப்ப முயற்சிக்கும் இப்படம், அந்தக் கருத்துகளை வலுவான திரைக்கதையாக மாற்றுவதில் எந்த அளவிற்கு வெற்றி பெற்றுள்ளது?

கதைக்களம்

ஊர் ஊராகப் பயணித்து வாழ்வாதாரத்தைத் தேடும் நரிக்குறவர் சமூகத்தைச் சேர்ந்த ஒரு குழுவினர், குறிப்பிட்ட காலப்பகுதிக்காக ஒரு கிராமத்தில் தங்குகின்றனர்.

அங்கு தங்களது வழக்கமான தொழில்களை மேற்கொண்டு வாழ்க்கையை நடத்த முயற்சிக்கும் அவர்களுக்கு எதிர்பாராத பிரச்சினைகள் உருவாகின்றன.

கிராமத்தில் நிலவும் அரசியல் மோதல்கள், அதிகாரப் போட்டிகள் மற்றும் சமூகப் பாகுபாடுகள் இவர்களது வாழ்க்கையையும் பாதிக்கத் தொடங்குகின்றன.

அரசாங்கத்தின் அடிப்படைச் சேவைகளைப் பெறுவதற்குக்கூட இந்த மக்கள் பல்வேறு சிரமங்களை எதிர்கொள்கின்றனர்.

குறிப்பாக, நியாயவிலைக் கடை, தாசில்தார் அலுவலகம் மற்றும் அரச வைத்தியசாலை போன்ற இடங்களில் அவர்கள் சந்திக்கும் அனுபவங்கள், சமூகத்தில் நிலவும் சமத்துவமின்மையை எடுத்துக்காட்டும் வகையில் அமைக்கப்பட்டுள்ளன.

இந்தச் சூழ்நிலைகளைக் கவனிக்கும் சிங்காரம் என்ற கதாபாத்திரத்தில் நடித்துள்ள யோகி பாபு, தனது சமூகத்தின் நிலையை மாற்றுவதற்கு அரசியல் அதிகாரம் அவசியம் என்பதை உணர்கிறார்.

இதனையடுத்து சட்டமன்ற உறுப்பினராகத் தேர்ந்தெடுக்கப்பட வேண்டும் என்ற நோக்கத்துடன் தேர்தலில் போட்டியிட முடிவு செய்கிறார்.

ஆனால், சாதாரண மனிதராக வாழும் சிங்காரம் அரசியல் அதிகாரத்தை நோக்கி எவ்வாறு முன்னேறுகிறார் என்பதுதான் படத்தின் முக்கியமான திரைக்கதை.

சமூகக் கருத்தில் கவனம்; திரைக்கதையில் பலவீனம்

நரிக்குறவர் சமூகத்தின் வாழ்க்கையை மையமாகக் கொண்டு திரைப்படம் உருவாக்கப்பட்டிருப்பது பாராட்டத்தக்க முயற்சியாகும்.

சமூகத்தில் ஒதுக்கப்பட்ட மக்கள் அரசாங்க நிறுவனங்களை அணுகும்போது எதிர்கொள்ளும் தடைகள், அவர்களுக்கான அடிப்படை உரிமைகள் மற்றும் அரசியல் பிரதிநிதித்துவத்தின் அவசியம் போன்ற விடயங்களைப் பேசுவதற்கான நல்ல வாய்ப்பு இயக்குநருக்குக் கிடைத்துள்ளது.

இருப்பினும், இந்த முக்கியமான கருத்துகளை ஒருங்கிணைந்த கதையாகக் கொண்டுசெல்வதில் திரைப்படம் தடுமாறுகிறது.

ஒரு காட்சியிலிருந்து அடுத்த காட்சிக்குச் செல்லும் நிகழ்வுகள் பல இடங்களில் இயல்பான தொடர்பின்றி அமைந்துள்ளன.

கதாபாத்திரங்களின் செயல்களுக்குப் பின்னால் வலுவான காரணங்களை உருவாக்குவதற்குப் பதிலாக, ஏற்கெனவே தமிழ் சினிமாவில் பலமுறை பயன்படுத்தப்பட்ட சம்பவங்களையே திரைக்கதை நம்பியிருக்கிறது.

குறிப்பாக, சிங்காரம் அரசியல் அதிகாரத்தை நோக்கி முன்னேறும் விதம் நம்பகத்தன்மையுடன் சித்தரிக்கப்படவில்லை.

தனது வாழ்க்கை அனுபவங்களிலிருந்து பாடங்களைக் கற்றுக்கொண்டு, மக்களை ஒன்றிணைத்து, திட்டமிட்டு அரசியலில் முன்னேறுவதாகக் காட்டியிருந்தால் கதாபாத்திரம் மேலும் வலுவடைந்திருக்கும்.

ஆனால், லொத்தர் மூலம் பெருந்தொகைப் பணம் கிடைப்பது மற்றும் நல்ல மனம் கொண்ட கிராமத் தலைவரின் உதவி போன்ற தற்செயலான நிகழ்வுகளே அவரது முன்னேற்றத்திற்கு முக்கியக் காரணங்களாக அமைகின்றன.

இதனால் கதையின் மையக் கதாபாத்திரத்திற்கான ஆளுமையும் செயல்திறனும் முழுமையாக வெளிப்படவில்லை.

நரிக்குறவர் சமூகத்தின் சித்தரிப்பு

நரிக்குறவர் மக்களின் வரலாறு மற்றும் வாழ்க்கை முறையைப் பார்வையாளர்களுக்கு அறிமுகப்படுத்தும் நோக்கில் அனிமேஷன் வடிவிலான விளக்கக் காட்சிகளும் படத்தில் இடம்பெற்றுள்ளன.

ஆனால், அந்தத் தகவல்களை கதையின் நிகழ்வுகளுடன் இயல்பாக இணைத்திருந்தால் அவை மேலும் தாக்கத்தை ஏற்படுத்தியிருக்கலாம்.

அதேபோன்று, சமூக அநீதிகளை வெளிப்படுத்துவதற்காகப் பயன்படுத்தப்படும் சில உணர்ச்சிகரமான சம்பவங்கள் பழைய திரைப்படங்களின் காட்சியமைப்புகளை நினைவூட்டுகின்றன.

குறிப்பாக, பாலியல் வன்முறையை ஒடுக்கப்பட்ட மக்களின் துயரத்தை எடுத்துக்காட்டும் கருவியாகப் பயன்படுத்தியிருப்பது விமர்சனத்திற்குரியதாக அமைகிறது.

நரிக்குறவர் சமூகத்தைச் சேர்ந்த கதாபாத்திரங்களின் தனிப்பட்ட சிந்தனைகள், விருப்பங்கள், முரண்பாடுகள் மற்றும் முடிவெடுக்கும் திறன்களுக்கு போதிய முக்கியத்துவம் வழங்கப்படவில்லை.

அவர்களது வாழ்க்கையைப் பற்றிய அனுதாபத்தை உருவாக்க முயற்சிக்கும் திரைப்படம், சில இடங்களில் அவர்களைத் தங்களுக்கான முடிவுகளை எடுக்க முடியாதவர்களாகச் சித்தரிப்பது கதையின் நோக்கத்தையே பலவீனப்படுத்துகிறது.

நடிகர்களின் பங்களிப்பு

படத்தில் எம்.எஸ். பாஸ்கர் மற்றும் இளவரசு ஆகியோரின் நடிப்பு குறிப்பிடத்தக்கதாக அமைந்துள்ளது.

தங்களுக்குக் கிடைத்த கதாபாத்திரங்களை இயல்பாக வெளிப்படுத்துவதற்கு இருவரும் முயற்சி செய்துள்ளனர்.

யோகி பாபு முக்கியமான கதாபாத்திரத்தில் நடித்திருந்தாலும், அவரது நடிப்பில் எதிர்பார்க்கப்பட்ட மாற்றங்கள் முழுமையாக வெளிப்படவில்லை.

குறிப்பாக, நரிக்குறவர் சமூகத்தைச் சேர்ந்த கதாபாத்திரங்களுக்காக மற்ற நடிகர்கள் வட்டார மொழிநடையைப் பயன்படுத்த முயற்சிக்கும் நிலையில், யோகி பாபுவின் வழக்கமான வசன உச்சரிப்பு சில காட்சிகளில் வேறுபட்டுத் தெரிகிறது.

அதேவேளை, சமூக அமைப்பை விமர்சிக்கும் வகையில் அமைக்கப்பட்டுள்ள நீண்ட வசனங்கள் சில இடங்களில் இயல்பான உரையாடல்களாக இல்லாமல் நேரடியாகப் பார்வையாளர்களுக்குச் சொல்லப்படும் கருத்துகளாகத் தோன்றுகின்றன.

வேல ராமமூர்த்தியின் கதாபாத்திரமும் இதேபோன்ற வசன அமைப்புகளால் பாதிக்கப்படுகிறது.

இறுதிக்காட்சிகள் ஏற்படுத்தும் தாக்கம்

படத்தின் இறுதிப்பகுதியில் நரிக்குறவர் சமூகத்தின் நிஜ வாழ்க்கையைப் பற்றிய செய்தித் துணுக்குகள் மற்றும் ஆவணப்படக் காட்சிகள் பயன்படுத்தப்பட்டுள்ளன.

சமூகத்தின் உண்மையான பிரச்சினைகளைப் பார்வையாளர்களுக்கு எடுத்துக்காட்டுவதே இதன் நோக்கமாக இருந்தாலும், அவை திரைப்படத்தின் கதையுடன் இயல்பாக இணைந்ததாக உணர முடியவில்லை.

திரைக்கதையின் மூலமாக உருவாக்க வேண்டிய உணர்வுகளை ஆவணப்படத் தகவல்களின் உதவியுடன் வலியுறுத்த முயற்சித்திருப்பது படத்தின் பலவீனமாக அமைகிறது.

சமூக அநீதிகள், அரசியல் அதிகாரம் மற்றும் ஒதுக்கப்பட்ட மக்களின் உரிமைகள் ஆகியவற்றைப் பற்றிப் பேசுவதற்கான நல்ல கதைக்களம் இருந்தபோதிலும், அவற்றைத் திரையில் வலுவாகக் கொண்டுவருவதற்குத் தேவையான திரைக்கதை அமைப்பு குறைவாகவே உள்ளது.

சிங்காரம் திரைப்படம் எப்படி இருக்கிறது?

நரிக்குறவர் சமூகத்தின் பிரச்சினைகளைப் பற்றிப் பேச வேண்டும் என்ற இயக்குநரின் நோக்கம் படத்தில் தெளிவாகத் தெரிகிறது.

ஆனால், நல்ல சமூகக் கருத்தைக் கொண்டிருப்பது மட்டுமே ஒரு திரைப்படத்தைச் சிறந்த படைப்பாக மாற்றிவிடாது.

அந்தக் கருத்தை உயிரோட்டமான கதாபாத்திரங்கள், இயல்பான சம்பவங்கள் மற்றும் வலுவான திரைக்கதை மூலம் பார்வையாளர்களிடம் கொண்டுசெல்ல வேண்டியது அவசியமாகும்.

‘சிங்காரம்’ திரைப்படம் இந்த விடயங்களில் எதிர்பார்த்த அளவிற்கு வெற்றி பெறவில்லை.

எம்.எஸ். பாஸ்கர் உள்ளிட்ட சில நடிகர்களின் நடிப்பும், சமூகப் பிரச்சினைகளை வெளிப்படுத்த முயற்சித்திருப்பதும் படத்தின் சாதகமான அம்சங்களாக அமைந்துள்ளன.

இருப்பினும், பழக்கப்பட்ட காட்சிகள், தற்செயலான திரைக்கதைத் திருப்பங்கள் மற்றும் கதாபாத்திரங்களின் ஆழமற்ற சித்தரிப்பு ஆகியவை படத்தின் தாக்கத்தைக் குறைக்கின்றன.

மொத்தத்தில், சமூக அக்கறையுடன் உருவாக்கப்பட்டிருந்தாலும், திரைக்கதையின் பலவீனங்களால் முழுமையான அனுபவத்தை வழங்கத் தவறும் திரைப்படமாக ‘சிங்காரம்’ அமைந்துள்ளது.